Bayyinaango Pelle Pine Muritani: Kuulal jaŋde

Bayyinaango Pelle Pinal Muritani, ko yowitii e eɓɓaande sayira ɗowoore jaŋde leydi ndii.

Ko faati e sariya kuccam jaŋde
Suudu sarɗi ɓenninii sariya kuccam jaŋde ngenndi ndii. E dow bismaango Jaagorgal Jaŋde ngenndi e mbayliigu Tippudi Nehdi e Jaŋde, Jokkorde pelle pinal pulaar, sooninke e wolof tawtoraama haa timmi joɗle diiwaaniyankooje e ngenndiije jowitiiɗe he diisnondiral paatungal e mbayliigu jaŋde. Ngool tawtoregol ubbitiino golle Duɗal ɗemɗe. ngenndiije (DƊNg), addani yimɓe heewɓe tawtoranooɓe ñalɗi ɗii jaɓde jojjugol naattingol ɗemɗe ngenndiije Pulaar, Sooninke e Wolof nder Tippudi Nehdi e Jaŋde Ngenndi ndii. Caggal ɗuum, kawritte keewɗe e ɓatakeeji e jokkondire baɗdaaɗe e jaagorgal ngal, kam e
wasiyaaji ɗi Jokkorde pelle ɗee sakkitnoo e kala heen daawal binndugol sariya kaa, haa
huunde e wasiyaaji ɗii teskaa (Kuulal 7 paatungal e doŋle ekkol oo, Kuulal 55 paatungal e jaŋde mawɓe, huunde e taƴe Kuulal 65, e yeru) mballitii moƴƴitinde mo seeɗa. Nii woni, Jokkorde pelle ɗee, gaa gaa geɗe jawniiɗe kam e jilɓooje gonɗe e sariya kaa, kam fof kadi e sunaade ko Parlemaan oo waasi teskaade huunde e wasiyaaji baɗanooɗi e nder winndannde sakkitiinde ndee, ine heɓtini wonde gooto e hujjaaji ɗiɗi (2) dowrowi dallinannde pelle ɗee jaɓaama, hono naattingol ɗemɗe Pulaar, Sooninke, e Wolof e nder Tippudi Nehdi e Jaŋde leydi ndii, no ɗemɗe jannginirɗe e no ɗemɗe jokkondiral nii, ko jiidaa e cosgol « njuɓɓudi kalfinaandi ɗowde ƴellitgol ɗemɗe ngenndiije kam e ciynugol jaŋde ɗee ɗemɗe ».
Jokkorde pelle ɗee, caggal teeŋtingol heɓaare mum wallitde oo silsil no doole mum potiri,
ine ɗaɓɓi e laamu nguu nde waɗata heen yimɓe e kaɓirɗe e ngalu katojinaangu ngam moƴƴinde golle ɗee, ine ɗaɓɓa e denndaangal dillooɓe heen ɓee nde ngaddata heen ballal mum en mbele ko huccanaa koo ine laatoo. Jokkorde pelle ɗee ine ɗaɓɓi e denndaangal woƴaaɓe ndee Eɓɓaande, tuggan maa ko adii
fof pelle pinal ɗee, nde ɓeydata darnde e pellital nder hare haɓetee ngam yettinde hujjaaji goɗɗi ɗii, haa teeŋti noon e laawɗingol ɗemɗe Pulaar, Sooninke e Wolof.

Nuwaasoot, ñalnde 8 juko 2022
Jokkorde pelle pinal

Leave a Reply

Votre adresse e-mail ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.